Lungsim Mit Vaahsah Di'n Thum Vai

 
Lungsim Mit Vaahsah Di'n Thum Vai

📝 Joseph Doulunlal Samte

EPHESA 1:18 Na lungsim mitte uh vahsah a hing um a, Ama hing hatna kinepna bang, ahiei chi na theina ding u’leh, misiengthoute a A goutan ding thupina hausatnate bang,

I theichien nailou sil tampi um nalai hi.

Eilah a hagau a dimten zong Pasian lemguotdan theisiem hasa asa uhi. Sawltah Paul in kenzong "abukim lou in ka thei giep hi" anachi hi.

Tuachi'n Sawltah Paul bang in "lungsim mitte vahsah di'n" thum vaui. Eima a ding leh midangte adin zong.

Mitvah sa ding in lekhasim bou khu adawnna hitaleh, Bible sim tamte bou in ginna tam anei tuom uh abang dinga, tualeh Pasian min a siltam mukhe pen te zong hithei uhi. Khatvei vei adih bangnanleh adihkim hi kichi theilou hi.

Laisiengthou khu thuhing ahia, agieltu hinna hing (living) apat hing kipie ahi hi. Pasian toh kithuohkhawm (fellowship) leh salvahna Ama apat Bible theisiem tahtah te a dinga poimaw leh kuul ahi.

Psalm (Late) laigieltu thumna bang ipoimaw uhi. LATE 119:18 Na danthute apat sillamdangte ka mu theina dingin, ka mitte hing suhvah pieh in.

Laisiengthou mi khenkhat te'n atheisiem lou lai a, nang chientah a na theisiem chieng lamdang nasa maithei.

2 KORINTH 4:4 Tulai leitung pasien in agingtalou mite lungsim amielsah ta hi, Tuachilou in Pasian limleh mel kibatpi Khrist khantanhoi thupina in amaute asalvah kha ding hi.

Tami adawnna ahileh Pasian in I lungtang leh I lungsim ang honpieh a, ang salvah pieh ngai hi. Tambang ahizieh in hundam nailou te dinga lainatna toh ithum ding uh ahi.

NASEPTE 16:14  Tualeh numei khat amin Lidia... Paul thugen zui ding in a lungtang ahon pieh hi. Mangpa'n na angsep ngai hi.

Mangpa, ka lungsim mit hing honsa inlen, ka thei dinga lawm nakoi jousie hing theisiem sa in chi'n I hinna I hagau jousie toh thum vaui.

Mangpa'n hing guolzawl chiet tahen.