Mangpa na aw neemnou za ing - Khaiminlun & Joseph Doulunlal

MANGPA NA AWNEEMNOU ZA ING (July 3, 2014)

Lyrics  : B. Goumuanthang @ Frankie Ngaihte

Vocal   : T. Khaiminlun & Joseph Doulunlal

Leimihingte ka silsiamlai a tungtuang

Kumtawn a ka tenpi ding a, kasiam mihing hilou maw?

Kata hei a um natai? chi a

Ka awneem zapha nonlou nama?

      Mangpa na aw neemnou za ing

      Khelna toh dim kahi ziah in

      Nata din chingzou sing, Hing paisan mai in Pa.

Lei mihing aw nangbang ka itt dang umlou.

Kumtawn a ka tenpih ding a ka sisan a ka tatsa

Kata hei a vaitham den na tai?

Ka aw neem sangnuam na hiei ma?

      Mangpa na aw neemnou za ing

      Ka khelna tengtoh hing zuan ing

      Eina pom in aw Pa, Khial kia nawn sih ta vang

Ka ta itt aw, na khial kisia pumpum a

Ka siang na hing zotna kei din, thupi in lian hina e

Nang dia kasiam van inn nuam sung a

Lengkhom din, haibang hing na ngah ung.

      Misiangthoute minkhumna ah

      Ka min neikhum zaal in nuam ing

      Ei khut denta in aw

      Na siang kang tun dong in.

Note:

Tami laa hing piankhiat dan tomkim: 2014 kum in, Manniang Veng a ka innsung a study room ah, zingsang ann nezou naupang tuition ding te leh Hope Baptist Academy, Bible Hill a school naupangte teaching ding toh kisai a preperation bawl dia ka tou toh kiton in Pasian in ka lungsung ah tambang thu hing gen in tam laavui Ahing peta hi. Lunch zaw a kipan, ka gelzaw chet leh dinner din ang ki han chet hi. T.Khaiminlun & Joseph Doulunlal te'n album a sah di'n ang ngen ua tuachi'n asa masapen ahing hita uhi. Tuabaan ah Tv. Kaineo Touthang in hing ngen kia in Nh. Hoineilam toh Thadou kamteng in aneiveina di'n ang sakhekia ta uhi.

Ang houpi dan: Pasian in Bible tungtawn in iit tah leh kam neemnou toh hinna lampi, lamhoi, lamdih leh Ama deidan lampite zui ding in leimihingte Ang houpi hi. Hinanleh mihing te'n vang Pasian hatna awneemnou khu theisiam theilou, zachiang theilou, leh ngaisahlou a um uh ahidan ang theisah hi. 

Tamte ziahin Pasian in Joshua kam haam ang geeldoh sahta hi, Joshua in agen bang in, koi pen nna sem diing na hi uai? teel un, luigaal a napu-napa te uh Pasiante nna maw oleh Amorite mite pasiante nna maw, hinanleh kei leh ka innkuanpite'n vang Mangpa nna bou sem va ung (Joshua 24:15), achibang in ken zong Pasian awneemnou ngaikhia in ka zui diing a thamlou in ka mi hinpite kung ah zong ka theisah diing hi chi'n tambang laavui ang pawtdohta hi. 

Tamlai awlawl in sim in (read very slowly)

Pasian toh ka kihouna tambang ahing hita hi. Mangpa'n tambang in ang genta hi: Leimihing aw, ka silsiam tengtengte lah a thupipen, manphapen leh tungnung pen a kang siam na hi. Khumziahin nang sang a ka iit zaw dang bangma a umtasih hi. Ngai in, kumtawn a ka tenpi ding a kang siam na hi. Hei a um natai? Ka awnemnou zaphalou nata ama? Ahing chita hi. Khumbebin, ken zong Mangpa khu ka dawngta a, Mangpa na awneemnou kaza hi. Hinanleh khelna a dim, sianthoulouna nasatah toh kidim, na mitmu a kidahhuai mama ka hi ziahin, ka zumta a, mualphou ka kisa a, chimaw leh beidong ka kisa a, tamte ziah in na ta ding in zong ching kisalou ka hi man in nei hatna awneemnou khu dawnbuut ngam talou in hing paisan mai in ka chizawta hi.

Hinanleh Mangpa'n, Nang bang a ka iit dang umlou ahi, kumtawn a ka tenpi diing a ka sisan a kang leisa, kang tatsa na hi. Ka ta aw heilang a vaithaam den natai? Tahbeb a ka aw na zaahphalou ahiei? Oleh ka-aw saang nuamlou (sang utlou) na hi zaw ei? chi'n a awneemnou in ang chi vanguutta hi.. Khumbebin, ka naahngeeh a hing na ta a, keima tang in mittui luang in ka umta hi. Tuachi'n tambang in dawnna kang bawlta hi. Mangpa aw, kei ma hoina leh hoilouna thu toh kisai hinawntalou in nang ma iitna vang in nei suikheta (nang hawlkheta) chi ka thei ziahin ka kipaah peetmah hi. Tu'n vang nang apat kiphual thei ka hi nawn tasih hi, taimang thei zong ka hinawnta sih hi. Tamte ziahin Mangpa aw, tanah (hiah) ka um hi. Ka umna mun apat ka hoilouna tengteng tawh na sianglam zuan in ka hing peita hi, hing na ngaah inlen hing na pawm in aw Pa... ka kisiah peetmah hi tuni apat in na deilou bang a ka hinkhua ka zatna zousia tawpsan in nungbawl kia nawn sih ta vang, chi'n mittui toh kidim in ka touna room sung ah ka kapdenta hi. Thamlou in, tam lai ka gel laitah June 16, 2021 zaankim 12am vel in zong hitui (mittui) toh ka kiteh hi.

Tomkhat zou in ka lavui gel abaan ka'ng sunzomta hi. Pasian houpina tambang in a hing umzomta hi. Ka khelna kisia pumpum a Pasian lam kazot na ziah in Pasian leh vantung mite kipaah petmah uh ahi chi ang theisah ta a, tuachi'n Mangpa'n tambang in ang genta hi. Ka ta aw kisiah pumpum a ka siang na  hingzot na thupi hi na lawmlawm e. Vantung mite'n ka hing kipaahpi petmah uhi thamlou in ngai in na umna mun diing vaan ah (ka siang ah) mansa in ka koi hi. Leitung ah sep ding a poimawte hing sem khe zungzung in, tualeh innlam na hing pei a nang toh lenkhawm ding kaal ngaahla in misiangthoute'n khutjaahpum in haibang ka hing ngaah zing uhi. Khumbebin, kei zong ka lungsung kipaah petmah in tambang in ka dawngkiata hi. Mangpa aw misiangthoute minkhumna ah ka min neikhumsah ziahin lungdam in kipah peetmah ing. Tuni a pat, na siang ka hing tun dong in na khut in hing tudenta in aw, ka chita hi.

Tam laitengpen laigialsiamte gel bang a asimnopna ding a kang gel ahisih hi. Pasian in tam laa ang piah lai a ka lungsung a Pasian in ang houpi dan leh hitoh kisai a sil umdan teng Pasian thupina ding a kang gelkhiat ahi zaw hi. Pasian in thupina tangta hen!

Click this for Thadou Version

Click Here