Nupa Kal A Kingaihdamna

Nupa Kal A Kingaihdamna

Pastor T. Tunthianmang

Tangtel: “Huan kihehpih chiat a lainatna nei in om unla, Pathian in Khrist a nou a hon ngaihdam bang in, noumau leng kingaidam tuah chiat un” (Ephesate 4:32).

A hoih gige Pathian in hun haksatak a omte I hihlai in a hehpihna tungtawn in tutan chiang Ahonpi a I kipak mahmah ua Pathian’ min I phat masa hi. Tuni i thupi ding in “Nupa Kal a Kingaihdamna” chih iteelkhia ahi. Nupa kal hihkhelh/bawlkhelhte kivel a bawldik tuak omte bawldik theihna dia hun lemtang hoihtak piak a omlai ihihman in kipahhuai I sa hi. 

Laisiangthou I etchiang in ngaihdamna toh kisai chinih bang kimu thei hi: Pathian toh mihing kal a ngaihdamna-Pathian in mikhialte a hon ngaihdamna leh mihing leh mihing kal a ngaihdamna- I mihinpih, I tung a khialte ngaihdamna. Pathian toh mihing kal a ngaihdamna in khentuam neilou in a zawng/ahau, aneu/alian, a tek/akhang, anu/apa, mihing a piangta phot/mikhial kuapeuh a huamkhak bang in mihing leh mihing kal a ngaihdamna in leng mi kuapeuh a huamkha hi. Mimal khat-le-khat kal a ngaihdamna, lawmta kal a ngaihdamna, u-le-nau kal a ngaihdamna, sungta/putu kal a ngaihdamna, leh nupa kal a ngaihdamna leh adangdang huamkha vek ding hi.

Tuzing in ngaihdamna zatna ding chituamtuam tampi omtheite’ lak ah nupa kala kingaihdamna poimohdan tamlou in ngaihtuahkhawm lehang ichi hi. Mikhial, bukimlou tuak, hatlouhna nei tuak minih zi leh pasal a kinei, damsung a tengkhawm dia kinei, nupa hinkhua a theisa leh siamsa omtuanlou, kisintawm leh kipantawm nu-le-pa’ thumanna ziak bang, ki-it/kingaih ziak bang, kihehpih ziak bang, leh thildang tuamtuam ziak bang a kiteng/kinei a khosakhawm nupa hihna ah hihkhelh, paukhelh, leh sepkhelh bang omthei mahmah ding hi. Tuabang hun in leh tuabang hikhelh khakte ah kingaihdam tuah theih poimoh mahmah ding hi. 

Barna Research Group in 1999 kum a asuina uah 100 lakah 25% bang nupa kikhen  ua, nupa kikhente’ lak ah ginglou mite sang in gingtu nupa kikhen tamzaw uh ahihdan suikhia uhi. Nupa kikhente bangziak hiding hiam chih theih hikei mahleh nupa kal a khelhna kingaihdam theihlouh ziak bang hinuam mahmah hi. Kingaihdam theihna om hileh kikhenna hial tung ding in a ngaihtuahhuai kei hi. Sihna ziak hiam leh thildang kisiat ziak leng hituanlou a nupa kikhen chih bel thil omthei khat ahi, himahleh kisiatna ziak, angkawmna ziak hiam, banghiam kitheihsiamlouhna ziak/kituahlouhna ziaka nupa kikhen chihte atangpi in ngaihdam theihlouhna ziak hi nuam mahmah hi. Huaiziakin, nupa kal chidamna ding leh innkuan chidamna ding in ahunhun a khelhna ngaihdamna poimoh mahmah hi. 

David & Claudia in “Ngaihdamna kichi nupakal chidamna dia poimoh mahmah ahi. Ngaihdamna tuh nupa kal a itna kizopna nalsaktu sathau ahi a, niteng a I poimoh sathau ahi” chiin gen hial uhi. Pate, na zi’ gamtatna, kampau leh omdan na lungtang hon nasak na ngaihdam theihlouh omkha zenzen hia? Zite, na pasal omdan, kampau, gamtat hoihlou nasak, na lungtang hon nasak ngaihdam theihlouh na kem kha in na lungtang tawng ah selguk khinkhian na neikha hia? I koppih tung a khatna lungtang neikha I om zenzen leh ngaihdamna lungtang a I khek poimoh ding hi. Hon sihsan nung nangawn aleng a khelhna ngaidam theinailou, banghiam hun a lungtang a khaatna hontun theilai chihbang leng om thei ding hi. 

Huaiziakin, nu leh pate aw, Pathian in atung a I hihkhelhna, a lungtang I natsak khaknate tengteng Jesu Khrist tungtawn a a hon ngaihdam taaka, I tung a khaatna lungtang hiam, thangpaihna lungtang hiam nei nawnlou a I Pathian a damtak mahbang in I nupa kal a hihkhelh/bawlkhelh/paukhelh khakte leh lungtang I kinatsak khakna omte akipan lungtang chidam I neihtheih na ding un I kingaidam tuah chiat ding ahi.