GNFA November Report Tomkim

GNFA November Report Tomkim

Amasapen in I Toupa Jesu Khrist' min in chibai ka hon buuk uhi!

Kipahthu genna leh thumpih ding point tamlou ka hon taaklang nawn uhi:

Noute thumna leh thilpiakte ziak in mission field ah Pathian in khamangthangte lak ah naaktak in missionary te hon zang zel hi.

November tarik 22 ni in Guwahati apan in EBCC Guwahati Saptuamte'n sound system a zatlui uh hoih mahmah lai hon piakte uh va ki la a, Guwahati EBBCC Saptuamte tung ah kipahna sang petmah hi. Vante bittak in mission field tut ahi a, kipahthu gen ni.

Guwahati apan innkuan bangzah hiam te'n leng a puan zatluite uh bora khat hon po sak ua, kipahhuai petmah hi. Guwahati Dorca pawlte'n leng December a Christmas gift ding in second hand kon pe ding uh hon chi lai ua, kipahhuai lo sawnsawn hi. Kipahthu gen ni. Ka sepna mun uh nam tuantual ahih man in second hand hon pia utte kipahpih gige ahi.

Rohit Kumar Reang kha kum 19 mi, 30 km vel a gamla mission field a class 7 English medium a sim om sun ahi. Zingkal khat a thoh in a khe tegel leh a khut tak lam zeng mawk hi, innlam ah hon paisak ua, thumna ka va neih sak a, inn ah ni 7 lam bang a om nung in et hak sa in, bike a dakkal khat val taina Makunda Hospital a kava tonpih mai hi. Sum leh pai nei tamlou ka hih ziak in lau thawng pi in hospital ka zuan ua, hospital ah Samari mihoih Heutunu Mary Ngaihte toh kava kimu kha ua, damdoi, hospital om man, ann nek man natawm free in hon bawlsak a, a tung ah ka kipak petmah uhi. Damtak in hospital ka nuse thei ua, kipahthu gen ni.

Unaupa Talbong Reang, Joingka Reang leh Unaupa Debjoy Reang te innkuan nih leng counseling kipe tou zel a, gingtu a hong suah theihna ding un thumpih ni.

December tarik 2 (nih) in Pathian kiang ah Biakinn ding latna neih zoh in saptuam memberte toh ginna in Biakinn bawl kipan hi, foundation ki bawl lel a, window nuai lam teng teklei leh cement a bawl lel ahi a, a tung lam teng sing (wood) a bawl ding chih ahi a, singte a kaat ziak in order bawl thak zel ngai a, a ki daih ding sing kimu nailou hi. Buaina omlou a bawlzoh pah ahih theihna ding in thumna ah phawk ni.

Innlam apan in mi phatuam ngai mi 4 biakinn lam ding leh ministry a hon panpih dingin hong kuantou uhi. Amaute Khuphau (k63), Khupzapau (k47), Mungkhansiam (k18) leh Muansang (k19) te ahi ua, Ministry lam a ding in Muansang ahi a, tulel in B.Th. sim lel a, gospel song composer leng ahi. Kipahthu gen in thumna ah phawk ni.

Tukum Sports Meet, Advent Christmas, Carol service, Christmas leh New Year zang ding in naktak in kisak kholhna pai lel a, Toupa'n a poimoh bang a mite tungtawn a hon piak theihna dingin thumna ah phawk ni.

15 December apan in nitak teng in Heutupa Muansang makaihna nuai ah Children's ministry leng neih kisawm a, Naupangte'n Advent Christmas, Christmas leh Kumthak a ding in kisakkholhna leng nei kawm ding uhi.

Kum nawn apan in Primary school, Nursery, LKG leh UKG pat nawn ki sawm a, Toupa'n school room 3 bek a hon piak theihna ding in thum ni.

Tulel in ka zi in naupaai a, damtheihna toh kisai a doctor toh kinai a om a poimoh mahmah ziakin innlam ah om lel hi. Dam tak a nau hon paai a, a neihkhiak tanpha a, a hong lohchin theihna di'n thuumna ah honna phawkpih un aw!

Mission field a om missionary te'n chidamtak leh hangsantak a gospel ka puanzak theih zel ua, huai ban a ngaikhetute'n a theih siam zel theihna ding un phatuam ngaitak a honna thumpih dingin kon ngen uhi.