Kumpipa Bangchi'n Na Zintun A?

Kumpipa Bangchi'n Na Zintun A?

WAY2GOD

WAY2GOD a lai ki gialte leh a website ana visit gigete na bawn un ang peipa ding i Hundampa, Jesu Khrist, min in chibai kang bu masa hi. 

Tuni'n eite hing hundamtu Jesu Khrist pian NI gualnop Christmas ang nai toh kiton in Hundamtu zintun dan chituamtuam te baan et lei ut huai i sa uhi.

Eima ut leh utlou thu hilou in, i Kumpipa uh Jesu Khrist vaidawn a ngai teitei hi aziahpen i zintundan dungzui un thukhenna ituah ding uhi. Tuaziahin bangchi'n na vaidawn/zintun ei? Zintundan tuamtuamte ban et vai.

Jesu Khrist pen mi zousia Hundamtu ahi. Adam leh Eve khu khelna ziahin Pasian toh a kizopna uh tan in kikhenta nan uleh Pasian in Hundamtu ding a chiam (Gen.3:15) agintaat ziah un hundam ahi veve uhi. Tamma bangin Israel mite zong Hundamtu (Messiah) koi ahiai chi thei sih nan uleh ginna toh a ngaah ziah un, agingta zousia in hutdamna amu uhi. (Tu hun in pen Israel mite hinanleh Jesu pen Pasian ahi chi pomlou a Christianity nual a Messiah hing pei ding ngaah nalaite vang a hundam tuan sih ding uhi). 

Adam-Eve leh Israel mi khenkhatte bangin Hundamtu munuam a ngaahla misianthou, Simeon pen "Mangpa Khrist amu masangsie ashi sih ding hi chi Hagau Siangthouin ana theisahta" ma bang in kipahtahin nausen Jesu khu angpom in Pasian kung ah kipahthu gen in "Mangpa tuin na thu bangzel in, na suoh hamuong tahin na peisah ding hi aziahpen ka mitin na hundamna kamuta" achi ta hi (Lk.2:25-35).

Pasian in pilna-siamna apiahte tungtawn in suahlam mipil thumte'n Jews te Lengpa, Leitung Hundamtu, piang ding ahi chi atheitah un a umna mun ua pan gim-le-tawl khawsalou in Bethlehem juan in aahsi zui uhi. Thamlou in Nausen Jesu mai ah bohkhup in silpiahte pia in abiah uhi. Tamma bangin belam chingte'n zong Mangpa vansawlsiang apat thu azaahtah un ki thalawptahin apeipai ua, silumdan ava enchian pai uhi.

Tualeh Mary leh Joseph pen a kiteeng hinailou, aki khaam (engage) ahi lai un tambang in Pasian kilaahna amu uhi. Pasian vansawlsiang in Mary kung ah "Mary zau sin Pasian deisahna na tang hi, na gai ding a, nau na pai ding a, tapa na nei ding a, amin JESU na hi sah ding hi [amite a khelna uapat ahutdam ding ziah in]" achi lai in, Mary in "Mangpa suohnu ka hi, na thu bangin ka tungah tung heh" achi ta hi (Lk.1:38). Tahsa kipawlna umlou a Mary in Hagau Siangthou apat tapa apai ziahin Joseph in aguh in aki hepkhiatsan sawmta hi. Hinanleh Mary ma bangin [a pasal ding] Joseph in zong amanglam in vansawlsiang a maituah a, "imu lai ang thokhiat phet in, Mangpa vansawlsieng thupiah bangin [a ki hepkhiatsan sawm Mary pen] a zi aki tenpita hi" (Mt.1:24). 

Tam a tung a igen mi tuamtuam te'n Pasian apat theina leh zaahna amu dungzui un apom pai ua ahinkhua uh ki henglamdang zen in a hinpi paita ua tuachi'n Pasian thupha aki tang chiatta uhi. Achileh nang-le-kei in Pasian apat direct a vision la kimulou a bangchi di ata diai? Ngai in unau, zanni-tuni-kumtawn a, angaingai khu Pasian ahi a, tuaziahin Ama apat thupot Laisiangthou zong bangchihlai pou in a dih gige ding hi. Tuaziahin tam atung a kigente sangin eite'n chian zaw in ithei zawbou uhi. Tambang ahita leh bangchi'n i Hundampa i zintun ta diai?

Khum hunlai a leng lian mama Herod in la ka leng hina hing suan ding hita chi'n lauthawng in atha ding dan a buaipi nalam ah sia-le-pha thei nailou naupang kum ni nei lang (below 2 years old children) abaanthata hi. Tuni'n i Hundampa uh Jesu Khrist lei ah hing piangta nanleh, atenna ding mun asiamsa na lungtang ah na tensahlou leh nang a ding in Hundamtu pianglou a suah ding hi. Tuni'n iMangpa'n nang-le-kei ang siam masang peh in atenna dingin i lungtang (ilungsim) khu ana siamzouta hi. Sawltaah Paul in ei, leimihingte pen "Pasian biahinn na hi uhi" chi'n eihilchianta hi (1Kor.3:16). Tuaziahin a tung a Jesu vaidawntu te igen bangin Jesu pen Hundamtu & Mangpa in i pomthei a zong Herod bangin i nual thei uhi. Tambang deiteelna nang khut ah um hi.

Ei mama khu Pasian tenna inn ihi uh chi achiangta hi. Pasian inn pen a neitu Pasian bang in a siangthou a, tuaziahin koi a SUBUAH (A NIEHSAH) pouma Pasian in a SUSE ding hi (1Kor.3:17). Thamlouin itahsa pen, i sung a um Hagau Siangthou tenna inn Pasian apat imu uh ahi man in Pasian in athupina suhlatna ding a ang etkolsah ahi bou hi. Aziahpen achiil apat atenna inn dia a siamsa hinanleh eite'n Satan ipiah ua Satan a dia izat nung un iMangpa'n ang iitna zaal liuliau in a sisan mantamtah tawh ang leisate ihi uhi (v.18-20 cf Eph.2:13). 

Nang-le-kei pen Jesu' sisan mantamtah tawh lei ihi taah ziah un, eima tahsatung na ngawn ah zong thu ineinawn ta sih ua Pasian a ihizaw tabou uhi. Na pomthei nai unau? a pomthei mite'n Jesu Khrist khu a Hundampa ahi sah ding ua, a Mangpa uh zong ahi sah ding uhi. Tuachi'n Mangpa Pasian deidandan chouh in a nungta tading ua, atahsa uh zong Pasian deilam bawlna in azangta ding ua, Pasian kipahna mimal, inkuan, hattuam, namte, gamte ahita ding uhi. Hinanleh keima ngelngel tung ah zong thuneina ka neinawn sih a, Pasian deina bang chouh a nungta ding ka hita chia pomtheilou (pom utlou) mite'n a siltuah ding uh ahi leh, huntawp ni chiangin Jesu'n a sisan man aphuulta ding hi.

"Hun kipah huai ah ka hing ngaikhie a,

Hundamna ni ah ka hing panpi hi,

Ngai un, tu hun kipah huai ahi a,

Ngai un, tu hundamna ni ahi" 

- 2 Kor. 6:2

Tu khu Hun kipah um leh Hutdamna ni ahi lai pet in Jesu Khrist khu Hundamtu leh Mangpa a pomthei chiat dingin simtu zousia Mangpa'n athupha hing tangsah chiatta hen. Amen!