DISTRACTION IN PRAYER

DISTRACTION IN PRAYER

Pastor Dr. Dongzathawng

Devotional # 19 ( Vol 4)

Fellowship of Thirsty Souls and Hungry Hearts

Thirsty souls simtu tengteng jingpha!

Tuni khu nang ading a na ngahla, na lam-et et  silkhat na mu ni hita hen!

Tuni Topic: “DISTRACTION IN PRAYER”

Introduction:

Pasian hepina toh weekend ki tung hamham e. Kipah huai vawt. Guah ju nuai a tate school tuamtuam 3, timing tuamtuam a va thah va la pen bailou hi. Ahiin Tate itna jieh in bangkim ki pua jou hi.  Tulai ka biahinn ua NuTe Pate Camp ka nei laitah uh ahi. 

Amasa in Pu Mang Taithul toh ka ki houlim na Weekend Horn hing na et sah te tung ah ka kipahna ka hing gen hi. I nung et kiakia leh i gen sawmte ki genkhalou, i genlou ding ki gen kha chi bang ki mu in. Houlim pen a kisiamlou mama ahidan kimu khiah in um hi. I gam a i vei tampi gen khahlou, tualeh ka topic ua point hoi pipi gen khahlou lam ki mu thahthah in um hi. Hinanleh hibang kal a jong kipapina comment hing pia teiteite tung ah kipah mama ing. 

Tulai i gam a siltungte ka et leh ka lungtang asou in sou jiang hi. Bangpen gel ding zong ka thei sih hi. tam sengseng.

Adiah in Dr Mark Haokip kimatna tungtang a i gam a leader te chauh dan ka ipla ta lua hi. I nam kituahlou dan, i pan khawm theilou dan uh zong kichai vawt hai e. Maban a koikoi hing ki man kia ding theijou hinonlou hi. 

Phaijang mi Meitei ten I gam ahing dugaw dan uh leh eite ki tuahlou dan, ahing laulou dante uh i et leh lainat huai talua hi. Alang khat ah I lamkai te CM pa maipha en ki tu a, ama uh maban ding khualna kiveng leh sip dide a umte zong  ipla huai seng hi. Election lai a manifesto te uh banglaw sawm hita uh?? Mipi in apoimaw lai a voice Nei Ngamlou, mel kilang Ngamlou, ding khia Ngamlou a ki PhualPhual leader in a makaih namte leh mipite ihi dan ki lang jel ei! 

Tu hun pen nam leh gam ngaina, leader hi in, mipi hileh zong kimukhawm a, kihoutuah a, kikai khawm a, i kikal kithei siamlouna neunounoute beisah a, pan khawm a i kaban le i khangsawnte khualna bang e khat pat hun hita hi.

Ama uh te, ei lam te:  hanglamte, sahlamte, a Zomite, a Kukite,  Hmar groupte  chite toh buaihun hinonlou. Nam min Mindih leh dihlou toh buaihun hinonlou, hunpaisa kituahlounate gengen hun hinonlou.  I chiin dan uh khatlamte abuai leh khatlamte'n muang tah a Ana gal-et, khatlamte a thuah leh khatlamte'n lemtanna ana la chite beisahta himhim vai…Hibang I “ki Jawng Gep lungsim” ipuahpuah lai un midangte'n I gam I leitang hing lahmang sah ding in eite pen forerigners chia hing ki nawmang ding hi. Lamkai hi in mipi hilei khanglouta mama va ui. Ngaidan kibang sese ngai sih. I survive na ding uh Ngaitua phot ni ui. Ukraine te'n a ki tuah jieh un Super power country  khat a ki thutuah jieh un nangzou uhi.  Nidanglai ZNC movement lai a Pu S. Thangkhangin Ngaihte in  Sardarji khat thugen agen sawn “ Naga 100 aki meeting uleh idea 1 piang hi. Kuki 3 a ki hou uleh idea 4 piang hi” achi khu hinonda teitei tahen!

A langkhat ah Pasian in ahing kepsah I Zogam nuamnuam ichichi ua kanilei ki suan dim namte hi uhi. Hagau lam ki sangsah in revival bang I bawlbawl uhi. Govt leh gingloute tanpha in ahing khamsah leh zong kibawl teitei namte ihi ua, Pasian in “Ka gam leitang kemtaah hinon sih uhteh, a tengtaah na hinon sih uh.” chia ahing lahsah ding hita leh kilawm hi. Pasian gam leitang a Kani Gu suandim namte apat in Pasian in agam apat a nawhkhiah leh lamdanglou hi. Aman ama mi tel Israel namte zong LUA khia (Sie khia-vomit) hi (Leviticas 18:25-28). A gam in hing luakhia ding chi khu Pasian in a mite a warning na ahi. Eite bang ihi tuan uale? Pasian in a namtel Isrealte gam leitang luakie sah a Gamdang a sawl mang leh? 

I gam a KANI  lei bawl u toh kisai in Amercan poet RALP WALDO EMERSON Poem “HAMATREYA”  “Hail, Mother Earth” chi pansan in message ka gel hi ahi vang in hun nei sing. 

Tualeh I nam leader te uh ama uh I gam leh i Nam leh i future sang ua ama uh let ding leh nopsah ding  ngai poimaw jaw a, ei hing val tumtum sawmte maipha va enente toh kisai ah NOVEL: ANIMAL FARM by George Orwell pansan in message gel zong ka ut hi. Hinanleh ka gel man sih hi. Tulai i gam leader te umdan ANIMAL FARM khu himai hi. CM Biren maipha ka mu pou leh adang teng asuahsuah suah chi khu hiphot mai hi. I telching MLA teng in ANIMAL FARM laibu nei chiat uh henla himi drama a minte koi pen toh ama aki tuah ei chi ki enchiat uleh ka deisah hi. 

Ahiin Tutung Pu Paolenlal Haokip umlou leh THREE BILLS lai a luang 9 kijam khu Bangma hilou ding hi. Aman re-enforcement (Commando) hing pai dingte ana dal hi. Pa Khum Hauzel zong patat huai hi. 

Hite ahi tulai ka vei leh ka thumna…Kei pastor in hite buaipi da tavang. A expert leh a kisai pi te'n hing sunjawmta un.

Tuni I TOPIC ah lut ta vai. DISTRACTION IN PRAYER

Tuma deu  in thumna toh kisai ka houlim lai un lamkai khat in “I lungsim a siangthou lou leh bang chi thum ding lah? I thum theina ding a i lungsim teng i suhsiang masat ngai hi” chi hi. Dih nasa thou ei? Gelnal bangsim na a hinanleh hia unau pa in thumna toh kisai bang ahi chi thei nailou bang hi.

Na thum chiang in na lungsim ah sil tampi ajatjat abanban in ahing ki lang jel ei?  Atung a kigen bang in koi adiai lungsim siangtah ah, lungsim a sildang kilanglou a thum thei ding??

Kenzong nidang in ka thum chiangin thildang hing langte khu abeina ding in kana thum masa jel hi. “Mangpa ka lungsim a umte hing laahmang sah in, Lungsim siangthou ing pia in” ka chi jel hi. Ahiin tu in vang tuabangin ka thum nonsih hi. 

Our Daily Bread nichin devotion na laibu nidang in ka phattuam pi ka chileh tulamlam in dau kasa deudeu a, lah ding ka thei tawm deudeu hi. A simjong ka thasieta hi. Lei zong ka lei utnonsih hi. Ni 365 sungin article lah thei ding ka mu tawm mama hi. Achangchiang ka leilou kum zong um hi. Ahiin ka mu khiah thah ahileh kum 1 pumlum kasimna a thilkhat mai ka mu khiah leh zong simtham in ka ngaitua a ka sim kiata hi. Adiahin 2020 pumlum in article 365 lai ah thil 2/3 mai ka mu a, tuate lah ah tu a ka hing gen ding khu khat ahi a, manpha kasa seng hi. Simlou khaah ding ka zauta zen hi. Article 365 lai a thil manpha 1 imu leh zong simtham ka chita hi. 

Jennifer Benson Schuld in CS Lewis Laibu The Screwtape Letter a thumna toh kisai Lewis in agen:  “He noted that when our minds wander, we tend to use will power to steer ourselves back to our original prayer” chi hi.  I thumchiang ua i lungsim a thil tuamtuam ang um chiangin eima will power toh kisuh tang sawm hi chi ahi. 


Ahiin Lewis in a lah dan : “The distraction as our present problem and lay that before God and make it the main theme of our prayers” chi hi daih hi.  Ama gendan in i thum chiang a i lungsim a thil tuamtuam, mi hing housietna, thildihlou  hing kilangte, ahilou leh i lungthahna, ahilou leh thil hepi huai imu te i lungsim a hing kilang tuamtuamte khu i thumna ding a Pasian hing piah hijaw hi chi ahi daih hi.

Tuatoh kijui in Philip Yancey in “I try to incorporate the distraction into my prayer. In many cases the distraction becomes my prayer” chi hita hi.  Ka lungsim hing subuai, sil tuamtuam ka thum lai ahing kilangte khu ka thumna point in ka mang hi chi ahi. 

Philip Yancey ahileh khual zinna, khawlai vahna vel a a thil mute thumna in jangtou zelzel hi; “I try to turn those otherwise wasted moments into prayers” chi hi.  “I pray while watching the news, or during commercial( think how much an advertiser pays for 15 second of my time” chi hi. “ I pray for the people inside as I pass a  neighbour’s house, a church, a bar, an Aids clinic, a university” chi hi.

 Ama gendan in khawlai vahna a mit a amu, alungsim a hing kilangte khu a thumna item ahimai hi. TV et chiangin zong TV a hing kilangte thumpi hi. Adiah in advertisement bawlman pen tam mama hi. Tua commercial break a sum tampi seng a hing kilangte khu thumpi tah chichi hi. A khawlai vahna  venga innte, biahinn a mute, hospital leh office leh  amit a mu, amai a hing kilang jousie khu a thumna item hisah thei hi.

Tunia  i gen khu i thum chiang lungsiang tah nei masat ding, I lungsim suh siang masat a thum ding hitheilou hi. I lungsim a hing kilang teng khu i thumna ding a Pasian hing piah himai hi. 

Tumalam deu in ka thum phot leh i gam dinmun ngen ka mai ah hing kilang hi. Tuate khu khahtan, suhsiang, dalphot chi um seselou in tuate ading in ka thum jel hi.

I thum laitah a i lungthahna, ahing housie, aw sie i bilha a hing kilang, janni a i siltuah khial hing kilang, ahilou leh hun paisa a mite hing bawlsietna hing kilang, ahilou leh khoimun e khat a hepi huai isah mama i mitha a hing kilang, ahilou leh i YouTube Etna apat a hing kilang leh adangdang ithum chiang a hing kilang simsenglou um hi. 

Tuate khu i thumna item ding a Pasian Hagau Siangthou in ahing koisahte hi jel ding hi. Ahilou leh i ngapla mama, i huphul mama, I thasiet mama, I tha hing nemsah, i ngaitua leh zong i thajawi sah thil zong hing kilang ding hi. Tuate khu i thumna ding a Pasian in ahing piah ahijaw hi. “Mangpa hing laahmang sah in. Aning in ka ning, agim in ka gim” chi a thum ding hilou in Pasian kung a tuate khu tut dingin ama tung a buhkhiah jel ding ahi. 

I thum chiang a lungsim a thil hing kilang, ahing subuai chia i dal ding dan, I suhsiang ding dan lampi hoipen khu tuate ading in thumlei hing awlsawl in mang  hialhial ding hi. Ang manlou leh  I thumthum nalai ding a Pasian in ahing piah hi ding hi. A suhsiang, A daltheina hoipen khu tua ahing subuaite khu i thumna hi sah lei a damdawi hoipen ahi.

Ahiin atahtah in thil i ngaipoimaw mama, hin leh si kikal a i thum chiang bangma in hing subuai theilou ding hi. I ta damlou buaise thum ding hilei bangma in hing subuailou ding hi.

Yancey in: “When you are praying for what you really want you will not be distracted. People on sinking ships do not complain of distractions during prayer” chi hi. Umjie khu kuangsie a tuipi a tum ding hileh chin na thum chiangin bangma dang hing kilanglou ding hi. Distraction toh na buai sih ding hi chi ahi. 

Ahiin atamjaw niteng a, kalkhat a 7 vei, ha khat a 30 vei jingkal teng a thumthum a, i bawl ngai ma, thum ngai ma, i thumna mun ma a thum thumte dingin i lungsim hing subuai tam hi. I thumna tuilou, lunglutlou, fire umlou, Thasie deu mai a kithum, lunglutlou, thachau, ihmut suah … Hibang a dull deu a i thum hun tam hi. Thumlou ding lah hilou a hivang a, i thum na khu pai mongmonglou. I lungsim a Thil i ngaituana hing kilang tam seng hi. 

Hibang a thum hahsa hun pen gingtu hatlou leh pichinglou china hilou hi. Hagau mi leh Pasian toh ki thuathuate'n zong tuah hi.

Henri Nouwen in: "Why should I spend an hour in prayer when I do nothing during that time but think about people I am angry with, people who are angry with them, books I should read and books i should write, and thousands  of other silly things that happen to grab my mind for a moment” ( Prayer by Philip Yancey, 144).

Ama gendanin bang dingin dahkal asim bangma bawllou in thumna in hun ka mang diei? Ka lungsim ah banglou teng, ka lungthahnate, ka laibu simloute, ka laigel dingte, leh thil a saang a sim hing kilang hi” chi ahi

“As soon as we are alone, without people to talk with, books to read, TV to watch, or phone calls to make, an inner chaos opens up in us, The Chaos can be so disturbing and so confusing that we can hardly wait to get busy again” ( The Only Necessary   Thing, 37). A ma gendanin TV en nonlou, laibu sim nonlou, koima toh ki hou nonlou a pindan a siptah a thum ding a kang kisah chiang ka lungsim a BUAINA (chaos) khuh pi hing ki hongkhia in banglouteng hing kilang  hi” chi ahi.

Adih ahi. I thum masang a bangma umlou, thum ding a kilop mama hinapi, i mobile khoikhia, i room apat a  i hing thum pat leh i lungsim memory a ki store teng abanbanin hing kilang khia hi. I mobile a thu leh lim teng abanban in hing ki lang hi. Tuate khu ahi tunia dou selou a tuate khu i thumna item a jat hiau ding. Ahing subuai hilou in i thumna ding a Pasian hing piah chia lah jieu ding ahi. 

Ahiin Henri in “The remarkable things, however, is that sitting in the presence for God for one hour each morning- day after day, week after week, month after month-in total confusion and with myriad distractions radically changes my life”( The Only Necessary Thing, 139).

Henri Nouwen gen dan in Hibang a lungsim subuai simsenglou kal a zong jingkalteng a naikalkhat teitei, kalteng leh hateng a Pasian toh thumna a hun ka jat chiang ka hinkhua hing kilamdang hi chi hi. 

Unaute thum mi  galhangte'n jong thumhun chiang a hibang subuaipen tuah mama uhi. Hinanleh tua lungsim subuai te ziehin a thumna uh khawl tuanlou uhi. Tuate khu a thumna uh suahsah in atawpin gualzawlna tang uhi.

Tuban na thum chiang a na lungsim a Thil tuamtuam simsenglou lim leh mi meldei huai leh dei huailou leh, aw tuamtuam jahda huai leh jahnuam huai  hileh ahing kilang phot khu dalsawmlou in na thumna suahsah leh chin na thumna hing lamjangta ding h.

Ahing subuai te khu na thum pi ngai a hing kilang ahi jaw hi. Na thumpijou chiang abanban in  awlawl hing mang siangta ven. I gensa bangin Mangpa’n ata thum utte, thumna serious ngaite, thum mi utte thumdan hing jirsah jelta hen!

Topa Thupha leh I gam ah Shalom hing tung ta hen!

Jalennai Ni hing suah in Christ in vai hing hawm ta hen!