GNFA: Tripura Mission Field December 2021 Report Tomkim

GNFA: Tripura Mission Field December 2021 Report Tomkim

Amasapen in I Toupa Jesu Khrist' min in chibai ka hon buuk uhi!

Kipahthu genna leh thumpih ding point tamlou ka hon taaklang nawn uhi:

Noute thumpihna leh thilpiakte ziak in mission field a khasiangthou piina toh mabaan ka suantou thei zel ua, Voluntary a sem himahle ung Toupa'n nou te tungtawn in nek ding, silh ding leh ka poimoh tuam tuam te uh hon pe zel a, ka kipak petmah uhi.

Khristmas Carol ka nei ua, inn 26 ka veh suak thei uhi. Laa, thumsakna leh sweet ka pe zel uhi. Bible competition (NT Bible min, memory verse) leh Games & Sports leng ka nei thei ua, Prize leng a kilawm hun tawk piak khiat theih in om a, kipahthu genni.

Khristmas season sung in innkuan 3 kikhopna kineihpih thei a, gingtu innkuan 2 leh tuailai khat hong kibehlap ban ah Kum thak ah leng innkuan khat hong ki behlap hi . Bible mimal 5 leh innkuan 11 te kiang ah piakkhiat theih in om a, kipahthu gen ni.

December kha sung in Htp Muansang makaihna nuai ah Naupangte'n action laa tampi sinkhia ua, tunitan in sasa mai uhi. Kipahthu genni.

Tripura mission field a dia silh leh teen hon khaak EBCC Dorka Guwahati, EBCC BYF Bungmual, Nu Rose Niangkhanchiin te tung ah kipahna lian mah mah hi. Nou te ziak in kou te'n ka phulou un puan hoih pipi a na silh zou zel ka hi uhi. Non piak khawm te uh innkuan 29 te kiang ah hawm khiak ahi a, innkuan 5 lak vel a nu le pa te uh Hindu hilai ua, dan 4 a hawm khiak ahi a, a genthei diak te a pan in nitak 3 ki hawmkhia hi. Kipahthu gen ni.

December kha sung in GNFA in nau nei ding khat toh damlou 3 ki buaipih kha a, Basurani in kum tampi nau nei lou a neih patna ding ahih ziak in inn a ki nei sak ngamlou in Makunda Christian Hospital ah operation in nau pasal deihthoh huai tak nei khia hi, medical bill ₹ 14,000/- val bei hi. Huai ban ah Vuli Reang leng sih sual phial in om a, Makunda ah ki admit nawn a, hong pawt khe thei nawn ua, medical bill ₹ 6000/- val hi. Hiai a medical bill teng teng Unaunu Mary Ngaihte in honna gensak in cheng khat le lalou in hon ngaidam uhi. Kipahthu gen ni.

Damlou dang nih te ahihleh Damcherra leh Dharmanagar lam ahi a, Pa Keman Reang leh Naupang Phuihtui (kum 15) ahi a, Phuihtui pen sisan piak a ngaih ziak in Heutupa Mang Ngaihte, IEM Missionary in A+ unit khat hon piak sak hi. Amau te leng damtak in hospital taisan thei ua, kipahthu gen ni.

Lim a i muh bang in December 2021 tarik 3 a thuumna toh i na pat uh Biakinn pen 70% bang zoh in om ta a, tulel in a baang, kongkhaak, tawlet, a tuang leh verandah ding in sam hi. Huai ban ah kou leng mission field mun a tarpolin buuk kai a om ta ka hih man un, Quarter lianlou 12/24 ft beek lam khiak lunggulh in foundation ka pan uhi. Tunitan veina lianpi tak toh Tripura mission field a Biakinn leh quarter lam na dia sum leh pai a hon panpihte ziak in hiai tan tut in om thei ta hi, Toupa'n a tam sem in hon vualzawl chiat hen! Biakinn leh quarter bawlna pai lel dinkhawl a hih louhna ding in pangkhawm tou lai ni chi'n kon ngen uhi. Thumna ah phawk ni.

January kha sung in mi phatuam ngai Unaupa Sehminthang Guite in kaal khat vaal lam mission field a nnasepna leh ministry hong panpih a, damtak in tarik 14 in kik nawn a, inn lum tung nawn ta hi. Kipahthu genni.

Primary school: Nursery, LKG leh UKG tan beek pat uuthuai mah mah a, Toupa'n school room 3 beek a hon piak theihna ding in thuum ni.

Mission field a om kei leh ka seppihte Anonto Reang, Rindik Apeto te'n chidamtak leh hangsantak a gospel ka puanzak zel ua, ngaikhetute'n a theih siam zel theihna ding un phatuam ngaitak a honna thuumpih ding in kon ngen uhi.