Expandable

Expandable 
Pastor Dr. Dongza Thawng
Devotional # 134 ( Vol 3)
Fellowship of Thirsty Souls and Hungry Hearts

Lamka vangkhua Zokhopi apat in chibai leh Shalom!!

Date 12 in Lamka private Gari toh 9 PM vel in tung ung ei. Ahing thumpite jiehin kipah ing ei..
Ka innkuan un lamdang tah in gari khamlou in ka tung uhi. Lamdang vawt.

Inn ah ka tate nop sasengseng umtheilou in inn huang ah tai kawikawi uhi..
Kei zong ka book project nop tah in pankia thei ing.

Dictionay in expendable khu “designed to be used only once and then abandoned or destroyed.” Umjie khu thilkhat poupou or mihing khat hileh jong a poimaw na mun leh hun a jat chitah a jat ding in, i jatjou chiang a paimang, nutsia, susie or theipha nonlou china ahi.

Rambo part 2 ah American - Chinese actress nungah Julia in “why they picked you? Is it because you want to fight? “ chia adot lai in Rambo in “I am an expendable?” Chi in dawng hi. “what do you mean by expendable?” Chia adot kia leh Rambo in “suppose you are invited to a party and if you don't show up does not matter” chiin expendable meaning gen sah hi.

Hibang a mel thupi leh hat leh etlom Sylvester Stallion in ahinkhua khu expendable maimai ka hi chi in ki geel hi. Umjia khu ama pen mun jauhuai  pen koima bol ngamlou na mun ahi chiang ki sawl jel a, tua mission akichai chiang koi man poimaw salou in, manghil leh theiphah hilou jel hi. Achang ah iki poimaw sah vang in “Use and throw away” chidandeu kihi leltah hi. I disposal cup/plate te bang kihi lel hi.

Adiahin himi Thailand a war prisonerte hun khe ding Rambo chilou koima siam leh hangsan umlou a, hinanleh a ma support tu dingte a saplian penpa leh mihon khat in ama shi teitei na ding sai uhi. A mission teng buaisah uhi. Atomlam a gen in a mission shi-le-hin kal ah hing jou hi. 

Sawtlou jou in hibang War Hero pa khu manghil leh theiphahlou in umkia hi. Aban khu part 3 ah Afghanistan ah hing poimaw kia ding uhi. Aban pen gen jom da ta vai.

Bangding a Rambo movie hih Devotional a hing ki gen kawi???

Tunia nam leh gam leh society leh hattuam a ki poimaw sah mama, a founder, a architech ana hikha ahivang a tunia a manghil leh theiphahlou, tuamkoih leh niin bang a pampai a umte ading a neukhat beh hanthawnna ahi khah leh chia himi thumal topic a ka hing teel ahi.

Ei poimaw ikisah mama lai in mi ading in or i it mama inam te or i hattuam te leh i tanau te leh ih inkuante adingin mi ninhuai, mi buaihuai ki hi thei hi.  Abuai lai ua hing poimaw mama napi achi thei hun un nang pen niin bang a paimang na hi thei hi…

Mihing in or leader hi in i vanglai hun um hi. I vanglai bei hun a ki poimaw sah teitei pen mite ading a niin huai mama ki hi thei hi.

Ei leh ei ki vel a ki-et a: bang ding a hing ki poimaw nonlou chi ki ngaitua jong poimaw hi. Ahilou leh kei poimaw nonlou a ka namte, ka hattuamte, ka inkuante hi thei ta chia kipah thu gengen ding jong himai thei hi. Ahiin a chang ah mipite or new generationte'n jong i theisiam dingkhu miluite, mi masate jatatna pia khu gualzawlna akhangkhang peisuahna ding a poimaw ahi chi thei ding ahi..

Tunia i genut pen khu nang mi poimaw ahivang a nutsia leh pampai a um galhangsan nu or pa kung a ka hing genut khu expendable kisa in na ki ngaise maithei.. ahiin na umna mun ah thomhau huai leh ki ngaisiet huai maithei hi ahiin ngah hiithiat in thawveng tah leh sip tah in um phot in.

Expendable na hisih a nang pen manpha sengseng Rambo bang a special mission a ding a kheet leh kepbit na hi jaw hi.  Mailam galdou thupi seng a tu a hing ki tawldam phot a hi.  

Pasian in Carmel taang a showdown thupi tah ading in Elizah kum 3 sung koima theiphahlou, koima poimawlou bang in phual chip hi. Ajiehpen Carmel taang a Baal siampute leh Kumpi giloupa leh aji dawisenu Zejibel leh  anam paikhialte toh kimai tua a aki bei ding uh khu thupi seng hi. 

Khujiehin Pasian in mun theiphahlou na mun ah kum 3 sung preparation nei sah  hi. Tutung hattuam assembly tuamtuam i gam mun chin ah um ding hi (um jouta leh um lailai jong). Tualeh imai ah kiteelpina zong i maban ahi. Hihunte ah mi deihuailou tatate i nam vaihom leh hattuam lamkai in hing ching ding ua, mihoi chacha, mi poimaw chacha hing ki ning khiin in, pampai in hing um ding uhi.

Jatthei chacha, a fel chacha, a manpha chacha ki ningkhin in, hattuam leh nam buaisah leh gualzawlna sang a hamsietna tuntu dingte hing lal in hing thunei ding uhi. Hibang hun chiang Galgang tampite value bei, niin bang a pampai expendable hing suah bei ding uhi.

Tua bang Gospel Rambo Galhangte kung ka gen sah ut khu: lungkham sin…Pasian in nang khu hite maimai a dingin manpha hing saseng hi. Special mission nang ading in hing koisah hi. Hia vaihomna church politics kidah huaite maimai a buah ding in hing phallou  hi. 

Mission thupi, project lian, mi vantang or leader hi ut maimai leh popularity del leader maimai leh pastor narante'n a tham theinonlou missionte ah Pasian in hing jang ut hi jaw hi. Pasian in Mose ava kan khiah bang in hing kan khia ding hi. Mose jong kum 40 tah expendable bangin Pharoah hithei ding mi khat belam chingin nisa nuai ah kum 40 Pasian in pui hi.

Tunin sanggam aw! Pasian in amijat dingte khu or a galhangte khu jattheilou, a jatna ding bei bang in tuam koi jel hi. Tuakhu mailam a project or mission lianpi ading a kisah kholna hun in nei sah hi. Tunia nang pen galma sat ding ang ki guatlou leh thil 2 geel doh in: 

1. Nang ading in neu seng hi. 
2. Alian jaw nang toh kituah Pasian in plan neita hi.

Khujieh in expendable dinmun khu kipahtahin pomsiam in daitahin ngah hiithiat dan siam vai. Tua hileh i Pasian lungkim in hisang a munlian jaw, saang jaw, thupi jawte ah hing pui ding hi…

Leader khenkhat himi hun (expendable) thuahjoulou in groupism bawlin, party khomin ama uh thutunsah som in tanglai Absalom bangin shortcut in laltouna tu uhi. Himi expendable hun khu handle theilou in dou in, nang uhi. Aga khu leader/preacher mailam a jat thei ding mi hoi tampi Absalom bang in a hunlou in gangpi singbah a ki khaikaang (gangte ham) uhi. 

Kei jong tutung Shillong apat in Sachih Vangkhua ah khompi mang dingin kang kuan hi. Kum dang bangin hun khat jong ka tang sih hi. Hinanleh kipah tah a junior pastorte thugen ngai dingin ka um hi. Ka family leh lom leh gualte toh hunnop tah mang dingin kaki sa uhi. 

Ka huntanlou thawveng kaki sa mama hi. Ahing jatat pastor ki ngainiem mama Rev Khup in ahun ahing awn sawm teitei hi. Hinanleh ama hoi tah a kisa dingin ka hanthawn a ka thumsah hi.

Unaute Pasian mi jatte'n expendable hun jong um ding a, gal lamkai a ipan hun jong um ding hi. Stage a thupi tah a i tou velvol hun um ding a, anung lam a mipi lah a koima theiphahlou a i ning um hun jong um ding hi.

Mangpa'n bang dinmun a jong ahing koikoina mun a kipah tah a umthei ding leh ei hun ngahjou dingin Grace (bol jouna) hing peta hen!!

Topa thupha!

Shalom