Fly, Run and Walk
Fly, Run and Walk
Thirsty soul te i damchiatna uh maw!
Mangpan tunin nang ding in Na gal hing sat sah ta hen!
Tuni Topic: “Fly, Run and Walk”
Text: “But those who wait on the Lord Shall renew their strength They shall mount up with wings like eagles , They shall run and not be weary , They shall walk and not faint. “( Isaiah 40:3)
Introduction:
Tulai Shillong ah Patung hing um pan pan in janni tah in Pastor lawm Rev Helen Singsit leh nu Mary Kim te toh maite toh ka kang ua nop tah in ka ne khawm uhi. Tahsa leh hagau fellowship hun nop tah nei ung.
Ka tate 3 lah ah khat in exam jou suti. 2 tegel janni exam kipan. Nop e! Tulai tah in ka tate school tawp in park ah nop tah in ki mawl uh. Ama uh veng kawm in himi ka hing gel hi
Pasian in i thumna te dawng in Manipur buaina- forest reserve leh eviction te hing sip dingdeng ta hi. Thum jel vai. Isreal leh Ukraine ading in jong thumtou jel vai. Tulai kei buai na vawt ahileh ka laptop ( Macbook Air)kisia in ka siam sah leh kal 2 hita siam pha thei nai lou. Siamphat thei ding a ki nep huai non lou. A laptop a bei leh jong l ka File te beh aki lahkhia thei na ding in hinh thumpi vo. Ka book project teng um hi.
Laptop thah ( Macbook Pro) gift ding thuchiam um ta ahi vang a ka kung ang tun ding hun saupi lut nalai mai thei. Thumpi ngai ing e. Latop um lou in Langbai mama ing!
Topic ah lut vai:
Tuni i topic khu ka laibu Tuikha apat Tuihum ah detail deu in um hi a sim ut te ding in.
I text sim kia vai: “But those who wait on the Lord Shall renew their strength They shall mount up with wings like eagles , They shall run and not be weary , They shall walk and not faint.”
Ka Piangthah tung lai in Watch man Nee laibu “Sit, Walk, Stand “ khat kasim hi. A title khu aki le koih bang hi. Sit, Stand and Walk chi hileh ki lawm hi. Ama gen dan in gingtu hinkhua khu Sit a kipan ding aban ah Walk atawpna Stand chi ahi. Tuni i topic jong : Fly, Run leh Walk ahi leu leu hi. Walk, Run and Fly hileh ki lawm hi.
Hagau lam pai dan khu tahsa lam toh a kibat lou mai hilou in a ki pum kalna tam hi.
Tu in i thupi uh khen 3 in aban ban in tomnou nou in en vai:
1) They Shall Fly:
Gingtu hinkhu leh Pasian nasepna ah muvanlai bang a jang tah i leen thei hun um hi.
Gospel Alone a Lamka mipi te lapi in “Muvanlai bang in thu um te din, Simlei tung ah i lim leng in vaak vel maleh, I hinna zaw vansang a leng ahi, Khelhna nawk phak lou din Topan ahong domsaang.”
Muvanlai bang khawvel buaina mei leh huai pi jap khaah kheel lam a leen thei hun khu nop in thupi hina mai e! Hattuam politics, nupa buaina, insung buaina, guallel jieh a kaana, mite nual leh ki tuam bawl leh mite nelsiah jiah a liamna, natna te in bat phah lou na hagau gam mun sang tah a leng lai ahi. Pasian tang siangthou a teeng in Van manna toh ki vah in hagau lam pawi / golvah khollou in ki bawl hi. Hibang din mun te adingin Christian hinkhua a,guallel, nungtawn, lawsam, gam dai hinkhuo leh gingtu puhsia chite khu chiamnuina bang hi. A leenna gam sang seng in hibangte khu um thei ding in ngaitua lou hi.
Kum tampi nung in himi hun khu nua et kia lei “aw hibang hun ana um ngei ma hi maw?”chiin in ngai in ki lung leng hi.
2. They Shall Run:
Atung a mun sang lam a, meipi huipi jap phah lou a khawsah lai khu um thei gige leh hoi ding hia maw! Hinanleh christian hinkhua khu Pasian taang vum a teen den den hithei lou hi. Pasian in a jol neite tangvum ama umna, ama toh ki pawl na apat a kum suh a, amipi bongnou lim be te buai pi ding in kum suh sah jel hi.Himalaya tang kal te jong a vum nop nanleh ang kum suh uh ngai hi.
Tu in Himi hun pen muvanlai bang a leeng hun hinon lou in lenna haa ki la khia in leitung a tual a tai kipat hun ahi.
Hihun pen keng a atai a tai, adel del hun ahi. A chang ah sakol te tanpha toh ki taidem hun jong um hi. A gim huai mama ahi. Bangkim del ding ngen ahi. Ta vah mang te del ding, pasal vah mang pa del ding, ji vah mang nu nua del ding, hagau mang te del ding. Setan in aguh mang, sal a akai mang khang lai te nua del ding,Sum leh pai delh hun, hausatna, lawchinna delh delh hun. Min thanna, popularity delh hun, mi te hindan, chetdan, nei leh lam i phahna ding a delh hun.
Hattuam nasepna mite del hun, mite toh ki el a ki del huan hun. Dam thei na delh hun, pilna siamna del del na hun. Hagau hinkhua tan pha delh delh hun. Bible sim tam ding a delh hun, thumna jingkal devotion kai ding a delh hun, progm tuam tuam del hun, a ging gingna, mi tam tam na del hun.
Bangkim del delh , tai tai himai ahijieh in hihun pen gim huai mama hi.
Iki delpi, iki elpi te lah hat sem sem uh. Ei lah ba in ki puh deh deh hi. Ahin Pasian hepina jieh in hibang gim tah i tai lai in, liam thei, puh thei, accident thei hinapi Ahepina in hing na kem bit hi. Kum tampi nung a hibang i tai hun khu i nung et kia chiang i bang chi tai mualsuah adiei chi lamdang kisa hi.
3. They Shall Walk:
Tu in vang Muvanlai bang a leen hun khu tangthu bang a hita a, hattah keng a tai leh del del hun jong hun pei sa tangthu a hi ta hi.
Tu in chuh tai jou non lou awl nou nou a, pai thaw hun ahi ta hi. Ki naw mama napi tai jou lou, pai kin ut mama nanleh pai jou ham ham din mun ahi ta hi. Ki naw jieh leh lampi sau jieh a paikin thei ahi non sih hi. Himun hamsatna khu paina mun ki chian, khoi lam juan ding khoi tah mun chi te mu thei in kipia non lou hi. Tualeh mite muthei a ga pha, ga nei,luangkhia chi te manglam bng ahi ta. Ahamsa dia ahileh ngentang a kinutsia hun ahi. Lom leh gual umnon lou mai hilou in Pasian tanpha in umpi non lou a ngentang a ki hamsa sa a mial nuai a ki mai hun ahi.Bangkim ginna toh awl awl a ngah kom masawn jel hun ahi.
Mihing chi lou Pasian in jong ama leh ama ki tou del ding a nutsia hinkhua bang ahi ta hi. Gingna det lou tampi himun ah mangthai uhi.Khujieh in thugen ten FINISHing GRACE chi uh umlou a pai jom tou dan um lou hi.
Masawn leh masawn lou jong thei non lou khop a lamjawt hun ahi. Paina lampi dih leh dih lou jong thei chet lou hun, gensah tu leh puite umlou bang a ginna mai toh mial nuai leh gam dai kal a ki mai bang ahi ta hi.Bang tan ding? Bang chih chiang a puitu hing pai ding? Bang chih chiang panpi tu leh supply hing pai ding? Bang chi a khua vah tung ding? chi thei lou mai hilou in doh thei lou hun hi.
Khujieh in himi hun khu lel huai mama hi.
Thu tawpna:
Gingtu hinkhua khu : Walk, Run leh Fly (Pai, tai tualeh leng ) hileh kilawm hi. Hinanleh hi khollou hi.
Gari hileh Fly kichi khu gear 4 hiding a, Runing khu gear 2/3 lah hiding hi. Ahiin Walking khu gear 1 hiding hi.
Lamnop leh jaang ah gear 4 in bailam tah in ki tai hi. Gear 2/3 pen lam hahsa ahivang a ham sa seng lou ah ki jang hi. Gear 1 aki jat chiang pen lam tou mama, boh mama, naal mama, jau huai mama mun ah gear 1 poimaw hi.Ajieh pen a gari power teng hing ki luai khia ahi ta hi.
Khujieh in Hagau miten Muvanlai bang a Leng thei lai khu hagau lam a naupang lai ahi: sep lam lam pai jung jung, buaina kheel lam a leng thei.
Aban ah tai hun khu gingtu middle age vanglai tah ahi. Tha lah hat nalai. Bol Lam lam a a peak ( a vum) tung. Tai jung jung, jou jung, lawching huai huai. Ahiin atawpna ahi leh gingtu piching Abraham kum 100 ahi hun te, Jacob in ki bai a chiangphut aphu hun te toh kibangahi.
Tozer in ( Gems from AW Tozer) ah: “Sometimes you ate going farther when you are not going anywhere; you are moving faster when you are not moving at all; you are learning more when you thunk you have stopped learning”
Agen umjie in achang ah gingtu hinkhua khu : leng jou nonlou, sem jou nonlou, hat non lou, thei non lou, ga jou non lou, tai jou nonlou, vah ham ham, tawn mai mai chia awl awl pai hun khu i fuh pen, i hat pen i Ga nei pen hun ahi. Pasian power itung a agih seng jieh a awl pai, awl tawn ihi.
“ You have more power when you are in a low gear ( gear 1) but you have more speed when you are in a higher gear( gear 4)” (success nd christians,47)
Agen dan in gear 4 ah tai leh chin gang mama a hinanleh det lou hi. Gear 1 ah pen gang lou in ahivang in power hat pen pen ki jang ta ahi man in detdou ta hi chi hi.
John Wesley in : “When i was young i was sure of everything; in a few yrs having been mistaken a thousand times, i was not half so sure of most things as I was before: at present i can hardly syre of anything but what God has revealed to me”!
Agen umjia khu nidang lai in ka pianthah chill lai in bangkim athei ka bang hi. Pasian in siang tah in hing langsah hi. Ahin hun hing pai in thil tampi ka thei khial hi. Tuin vang bangma asiang non sih hi. Bangma ka thei non sih hi. Pasian in ahing kilah sah chi lou ngal bangma ka chian non sih hi” chi hi.
Umjia khu a piangthah tung lai in Pasian mapuina ki chian in thupi thei hi. Ahing khanlet jel bang in thil ki chian lou sem sem in. Ang pichin tah tah in chuh ginna mai lou ngal in bangma aki chian um non lou chi ahi.
Tunin muvanlai bang a na leen chiang in keeng a pai te musit sin. Na leen na ana leng sa uh hita. Hat tah a Na tai lai in awl awl a lam jot te sim maw sin. Tai hun kheel ahi ta uhi. Tunin awl awl na tai leh ki ngai sie sin. Gear 1 na jat jieh ahi.
Mangpan i um na chiat uh thei chian ding in hing siam ta hen!
Topa thupha !
No comments