ESTHER Vs MALACHI
ESTHER Vs MALACHI
Thirsty souls simtute Shillong tavang ni jingmawng kilawm tah apat in chibai leh shalam ka hing bawl hi. Tuni khu nang leh na inkuante a ding a kipahni hitahen!
Tuni Topic: ESTHER Vs MALACHI
Introduction:
I dam chiat na uh maw? Hing thumpi jel vo le! Monday ah Pasal Camp khuo 7 ki gawm a nei ding in Suongkot khuo lam Juan in kuan kia vang. Ka nutsia ding ka ji ka tate ading in hing na thumpi vole!
Ka nu zong i thumnate jiehin wheelchair bang jang thei ding in umta hi. A hatsem na dingin hing na thumpi jel vo!
Tulai local leh nation leh International hileh Bangma news update ding Nei sing.
Ka tate school kai thah leh lah ama uh mai ka buai pi hi. Tulai Watchman Nee tanchin ka sim a Pasian a ginna, akipiah jawna thupi hina mai e! Bible hichi juijou maijen, Laisiangthou a asim bangbang in mawltah in jui paipai hi. Koi hattuam, koi denomination thugin leh dan buaipi lou in Pasian thu a mute direct in simple tahin jui ngal hi.
Topic ah lut ta vai:
Esther Laibu khu mi masa ten Bible bu 66 lah ah ana pangsahlou uhi. Ana muang la uhi. Ana nualna uh tangpi khu chang 167 leh thumal 5633 lah a Pasian min khat vei zong pangkhalou, Pasian Thu ( Dan) Jong Kilou khalou, biahna, ki latna, thumna chite zong pang khalou leh adangdang jiehin nual uhi. Martin Luther in bang Esther laibu deilou mama hi. Ajiehpen Jews te gilou sa hi. Abang Abang hileh tunin himi lam sui ihisih hi.
Hibang a Pasian min ki lawkhah louna Laibu, Pasian danbu ki min phah Louna laibu, thumna leh biahna sillat leh Pasian phatna aw jong kisa khalou laibu leh Pasian namteel siangthou nungah nou khat in ginglou mi puteeh khat ji ding a a iki piah khiahna laibu ah Pasian ha up in um a, ha pang pang in pang hi. Pasian umpina thupi tah thamkhahthei, nual Guallou in ki mu hi.
Esther laibu ah atung a sakhua na (activities) khat zong Aki mulou lai in Pasian kihelna (presence) leh Pasian ha pan a, apanna tham khah thei in ki lang hi. Esther laibu ah Pasian min umlou ahi vang in Pasian um hi. Ravi Zecharias in “Book of Esther: The only book in the Bible where God is not mentioned, although he is inescapably present” chi hi( Cries of the Heart,188).
Pasian min leh Pasian biahinn, leh sakhua na naa khat zong umlou ahivang a Pasian hoi tah a kimu, kilang tah a a umna Laibu ahi.
Alangkhat ah Malachi laibu OT a laibu topna Malachi laibu en lei sakhuo nasep in dim hi. Pasian namtelte sakhua na abuai a buai ki mu hi. Ravi in hichin gen kia hi: “It can be said of Malachi that God is abundantly present in reference (in fifty-three of the fifty-five verses there is a mention of God) yet conspicuously absent in the people’s lives.”
I gen ut khu Malachi laibu ah Chang 55 lai ah Pasian min 53 ki lou kha hi. Hinanleh Malachi ah Pasian um non lou hi. Pasian in amite nusia ta hi. Pasian min loulou in, sakhua na semsem in, ki latna bawlbawl nan leh uh Pasian ki lang nonlou hi.
Ravi in “By the next time the nation would hear a prophetic voice, 400 years would have elapsed” ( 187).
Old Testament a laibu nukhia pen ahi dung juin Pasian jong amite apat ki hem mang ta hi. Pasian aw Kijah kiana ding in kum 400 hing ki vial ding hi ta. Hagau dangtah Pasian in a chi (seed/remnant) ten kum tampi angah ding uh ahita hi.
Tunia I gen sawm pen tah khu Ei Lamka te zong Malachi laibu toh kibang kasa hi. Pasian thu leh min vang I gam uah dim let e. Biahinn lah tam e, kikhopn alah non stop in um e. Camp, revival seminar lah tanlou in um e! La pawlte thupi e. Gospel album lah dim e. Pasian thugen na lah dim e, Thugen siam lah dim e. Mun jousie, gawljing jousie, Pasiana thu ki tah dim e! Hattuam office leh Bible college mun pi ahi. Pastor Tam na khopi. Missionary sawl khe tamte gam. Thummi tam dan leh thum pawl tam dan I thei sa, Thumna mual in a kimkot khopi. Loud speaker a Bible khawllou a kisimna khopi, Office negu leh, politician negu leh singnuai mi leader te tanpha Pasian ging leh sakhua mi te gam. Hibang a Pasian min leh Pasian thu leh, Pasian biahna aleh Pasian nasep ki uang bawl na gam.. mun chin, hun chin a Pasian min kilaw na gam ah Pasian umpina mangta bang hi. Pasian um nonlou bang hi. Um hileh Hibang Lawmlawm a kisialou ding hi. Hibang lomlom a I tate chavailou ding hi. Setan in Hibang Lawm a mun neilou ding hi. Setan Hibang Lawm a thunei leh hatlou ding hi. Christianity guallel na leh mualphouna society ihi ta.
Ahileh bang chi dan a Malachi a Pasian min Hibang a kilaw na mun a Pasian um lou a, Pasian min ki law louna Esther laibu a Pasian Hibanga a um adiei? Ken zong thei sing. Philip Yancey in : “Finding God in Unexpected Places” achi khu himai talou di? I Pasian khu gen theilou ahi. Um dinga gintat huai na mama a kimulou in. A umna ding a ki lom votlou mun ah ana um thepthup jel hi. Malachi a kimulou in, Esther a ha um a um jel.
Achangchiang bible sim a I thumthum chiang Pasian Hagau pawlna ki tangkhalou a. I vahna, i gari taina, i niin buahna, i lou hawna, i gamlah vahna, mun ah Pasian vena bang ki tang jel hi. Biahinn thupi leh program thupi tah ah Pasian pawlna ki tangkhalou in, mun neukhat, damlou vena khat, inn neukhat a thumkhawmna mun ah Pasian in ha pawl in hing pawl thei hi. Nang na thei kha ei? Ken ka tuah Kha ma ma hi.
I Mangpa Jesu hinkhua ah kilang mama hi. A hikhuo a a hunjatna te i et leh Sakhua lamkaite lah ah um khalou in Mikhialte lawmpa kichi a, damlou, mi phah, nual leh pampai a umte lai ah ki mu hi.
Philip Yancey in : “God has not absconded at all. Rather, he has taken on a disguise, a most unlikely disguise of the stranger, the poor, the hungry, the prisoner, the sick, the ragged ones of earth. We cannot detect God’s presence in the world, it may be that we have been LOOKING in the WRONG PLACE” ( The Jesus I never Knew- 232).
Tunin I biahinn thupi tahtahte, i progam thupi tahtahte, Maitam thupi tahtahte, Ann ngawl thumnate tanpha a bang ding a I lah ua Pasian kimu nonlou adiei?
Pasian khu i nelsiah uh, i pampai uh, i nual uh ami liangvai tasam gentheite lai ah um ut jaw hi. Ei buidling, ei changkang, ei music, ei progm thupite ah ama impressing lou hi.
Ama’n Esther laibu a ami genthei liangvaite lai ah poimaw kisa a, Malachi a thase sasa, kidih sah kawm a, mahni ki hoi sahna dim sakhua mite lai ah ama lunglutlou hita ding hi.
Bible ah Esther genlou Pasian min ki lawlou na adang jong um hi. Song of Solomon ah jong Pasian min ki lou kha lou ahi. Ahivang in Song of Solomon kheel a Christ-Moupa leh Hattuam-aji kham te ki Romance na laibu dang um lou hi. Hosea laibu ah Nupa kisie, ki hau, ki lemlou, ki khuul te hinkhua hamsat dan imu a Tua khu gingtu te leh Pasian kikal iki lem lou chiang a a hamsat dan hinkhua ahi. Song of Solomon ah Nupa ki-it, ki tuah, ki ngai, hinkhom nop dan ki mu hi. Gnigtu ten Christ toh i kal hoi tah a um chiang a nop dan song of Solomon ah ki mu hi.
Tuni I houlim na ua pat in Pasian khu a min mawh lawlaw leh hattuam leh sakhua vai a, moh pumbuai ah kipah lou in, chitah leh mawl tah a ama thu i jui sawma, ama itna a i itthuh chiang kipah in i lah a hing bual hi.
Malachi laibu chang 55 lah a 53 vei Pasian min ki law na ah Pasian umlou a, Esther laibu chang 167 a Pasian min khat vei zong ki law louna ah Pasian ha um in um hi.
Tuni'n I Pasian khu pudaang a pahtawi a kipah Pasian hilou in, lungtang a ama bangkim a I thupi sah a, ama i it pen a, kam Mai Hilou a, athu i man tahtah chiang in kipah hi.
Lamka gingtu ten I pulam sakhuatna uh i hohkhiat ua Pasian khu Song of Solomon a kimu bang a it pen ding, ngai pen ding, ki chi mat pi ding, mimal a kijop pi ding, a thu man ding, a keng tawp ding, Nupa ki teng chiil ki ngaina bang a I ngai na thah sah Jing ding ahi dan I jil thah uh ngai ding hi.
No comments